REPENSA A TÚA DESPENSA

 APRENDE A MANEXAR A TARXETA AMARELA 👌

O alumnado de Proxecto Competencial de 1º e 2º ESO, aprendeu a interpretar a tarxeta amarela, unha ferramenta proposta pola Consellaría de Sanidade para axudar as persoas a tomar decisións saudables á hora de facer a compra.

🤔 A diferenza do Nutri-score, esta tarxeta non vai outorgar unha letra a cada produto segundo sexa máis ou menos saudable, senón que simplemente informa ao consumidor/a de se ese produto que está a mercar ten un contido baixo (asociado a “máis saudable”), medio ou alto (asociado a “menos saudable) dos seguintes nutrientes:

• Graxas e graxas saturadas

• Azucres simples

• Sal e sodio

Deste xeito, poderemos facernos unha idea de como o consumo dese produto repercutirá na nosa saúde. Como norma xeral, debemos evitar produtos que obteñan puntuacións de cor vermella, pero é especialmente importante se por exemplo temos algunha recomendación médica, por exemplo, nos casos de hipertensión, diabetes, etc.

🧐 Co obxectivo de analizar a “oferta alimentaria” en distintos ámbitos deseñamos unha sinxela actividade que consistía en facer unha análise da alimentación dentro do núcleo familiar.

💁‍♀️ Despois de aprender a utilizar a tarxeta amarela na clase (ver fotos da sesión, na que analizaban os envases dos produtos que xa estudaran segundo o Nutri-score), unha vez na casa debían seleccionar 5 alimentos da despensa e decidir se eran saudables ou non, tendo en conta a tarxeta amarela.